Flik işi ələ aldı: "Bayern"i yenidən inşa edəcək

Hansi Flik koronavirus böhranı dövründə "Bayern" ilə müqaviləsini 2023-cü ilə qədər uzatdı. Artıq o komandanı formalaşdırmaq, Noyer və Alaba kimi futbolçuların müqavilə müddətini uzatmaq və sş kimi məsələlərdə daha özünə inamlı şəkildə qərarlar verə bilər.

İndiki vəziyyətdə hər şey 55 yaşlı mütəxəssisə uyğundu. Müqavilə müddəti artırıldı, öhdəliklər verildi və oyunçular yenidən məşqlərə qoşuldular. Gəlin, "Bayern"in gələcəyinə nəzər salaq:



Transfer planları:

Flik "veto" məsələsiylə bağlı belə bir açıqlama verib: ""veto" bir az kobud söz sayıla bilər, bu məsələni ilk dəfədi eşidirəm. Məncə, məşqçinin bu işlərə daxil olmağı normaldı. Hamımız məsləhətləşərək müəyyən plan hazırlayırıq. Amma bu tip planlar klub daxilində qalır."

"Bayern"in Vernerə olan marağı artıq sirr deyil. Robert Levandovski və Timo Vernerin eyni komandada çıxış etməyi necə baş tutacaq? Flik bu mövzuya da toxunub: "2 forvard, təbii ki, mümkün variantlardan biridi." O, bu çıxışında "mümkün" sözünü tam 3 dəfə işlətdi.

"Bundan əlavə rəqibin taktiki dəyişikliklərinə reaksiya göstərmək üçün heyətimizi genişləndirməliyik."-, deyə Flik bildirib.

Dəstək dirəkləri:

Tomas Müllerin də müqaviləsini 2023-cü ilə qədər uzatması Hansi Flik üçün yaxşı xəbərdi: "Müller müqaviləsini uzatdığı üçün şadam. Ümid edirəm ki, bir ya da bir neçə nəfər onu izləyəcəklər."

Həmçinin, Manuel Noyer, David Alaba və Tyaqonun da müqavilələrini uzatması gündəmdədi. Flik hər 3 futbolçunu da özü üçün vacib hesab edir:

"Noyer haqqında fikirlərimi hər zaman açıq şəkildə ifadə etmişəm. Alaba da oynadığı mövqelərdə yetərincə xeyir verə bilir. Tyaqoya gəldikdə isə olduqca yüksək səviyyəli və xüsusi futbolçudu."

"Bu səviyyədə, bu mentalitetə sahib olan futbolçularda işləməyi çox sevirəm. "Kiber" məşqlərdə onların konsentrasiyasını, əzmini gördüm. Bu, bizim üçün çox yaxşı idi."

Fokuslanma və intizam:

Koronavirus dövründə Hansi Flik oyunçularından mümkün qədər konsentrasiya və peşəkarlıq tələb edir: "Uğur qazanmaq üçün fokuslanmalıyıq. Bu, bizim tapşırığımızdı. Biz fokuslanmalı, buna öyrəşməli ardınca peşəkar və intizamlı şəkildə mübarizə aparmalıyıq. Bunun üçün mental gücə ehtiyacımız var."

Məşqçi heyəti:

Flikin komandasında Danny Röhl video-analiz mütəxəssisi, Tony Tapalovic qapıçı məşqçisi, Holger Broich fitness məşqçisi kimi fəaliyyət göstərəcək. Köməkçi məşqçi Hermann Gerlandın vəzifəsində qalıb-qalmayacağı isə sual altındadı. 65 yaşlı mütəxəssis akademiyada çalışmaq istəyir. Buna görə də Flikin yeni köməkçi axtarışında olduğunu deyə bilərik.

Bu mövqe üçün "Bayern"in U17 komandasının baş məşqçisi Miroslav Klozenin adı çəkilsə də dəqiq heç nə yoxdu. Flik bu barədə "Kloze ilə danışığımız olub. Onun məşqçi heyətimizdə olmağı bizim üçün yaxşı olardı. Amma Kloze hələ ki son qərarını verməyib."

Komandanın fəlsəfəsi:

Karl-Haynz Rummeniqqe Flikin müqaviləsinin uzadılmasının komanda üçün doğru addım olduğunu bildirib. Flik də öz növbəsində Rummeniqqenin fikirlərinə qoşulub:

"Çox çalışmalı, keyfiyyətli futbol oynamalıq. Nəticədə bu, komandanın inkişafından asılıdır."

Üli Hönessin "Bayern Kampus" layihəsini də unutmadı: "Akademiya oyunçularına şans vermək, onlara əsas komandada oynamaq üçün şərait yaratmaq hər zaman lazımdı. Akademiyamızdan yeni David Alabalar, Filip Lamlar, Tomas Müllerlər çıxacaqlar və uzun illər "Bayern Münhen" formasını geyinəcəklər."