Kwame Karikari

Ad: Kwame Amponsah Karikari

Vətəndaşlıq: Qana

Yaş: 26

Mövqe: Forvard

Boy: 1.88

İşlək ayaq: Hər ikisi

Transfermarkt qiyməti: 500 min avro

Oyunçu haqqında:

21 yanvar 1992-ci ildə Qanada dünyaya gələn Kwame’nin ilk professional klubu 19 yaşı olarkən yerli komandalardan biri olan İnter Allies olub. Burada 14 ay çıxış etdikdən sonra İsveç klubu olan AİK’ə transfer olunub. Bundan sonra Degerfors (İsveç), Balıkesirspor (Türkiyə) klublarında icarə əsasında çıxış edən futbolçu 2015-ci ildə digər bir İsveç klubu Halmstad’a keçib. Növbəti dəfə Balıkesirspor’a icarəyə göndərilən hücumçu son 3 il ərzində Norveçin Haugesund, Ukraynanın PFK Stal, Qətərin Al-Markhiya və Al-Arabi komandalarının şərəfini qoruyub. Karikari’nin çıxış etdiyi klublardakı statistik göstəricisi isə belədi:

Komanda – Oyun/ Qol/ Assist

AIK – 62/ 14/ 2

Balıkesirspor – 40/ 12/ 5

PFK Stal – 28/ 7/ 0

Haugesund – 16/ 7/ 0

Degerfors – 15/ 6/ 1

Halmstads – 15/ 8/ 0

Al-Markhiya – 11/ 3/ 0

Al-Arabi – 8/ 5/ 1

Ümumi – 195/ 62/ 9

Müsbət cəhətləri:

-          Fiziki cəhətdən çox güclüdü. Ola bilsin bəlkə də Azərbaycana bu günə kimi belə fiziki göstəricilərə malik olan hücumameyilli futbolçu gəlməyib.

-          1.88 boyu olan birinə görə ideal sürətə sahibdi. Əks hücumlarda və ya qapalı müdafiələrə qarşı oyunlarda öz dribling və araya qaçmaq qabiliyyəti ilə komandaya böyük xeyir verə bilər.

-          Hücumçuya lazım olan ən vacib xüsusiyyətlərdən qol duyumu və bitiricilik Karikari’də kifayət qədər var. Həm başıyla, həm də sol və sağ ayaqlarıyla fərqlənməyi bacarır.

Mənfi cəhətləri:

-          Əksər hücumçular kimi Karikari də topsuz oyunda öz effektivliyini itirir. Müdafiəyə kömək etmək, pressing etmək məsələlərində elə də yaxşı olduğunu demək olmaz.

-          Daim qola ac olmağı, qol vurmaq üçün çalışmağı müsbət cəhət sayılmalıdı, amma bəzən bu xəsisliyə də gətirib çıxarır. Lazımi anlarda ötürmə etmək yerinə zərbə və ya driblingə üstünlük verməsi mənfi cəhətlərindən biridir.

-          Tez-tez komanda dəyişməyi elə də ürəkaçan bir şey deyil. Bu, komandaya, kollektivə uyğunlaşmaq məsələsində müəyyən problemlərə sahib olduğunu göstərir. Neftçidə də bu problem yaransa, komandaya öz mənfi təsiri göstərəcək.

Oynaya biləcəyi mövqelər:

-          Mərkəz hücumçusu/ Centre Forward

-          Sol cinah hücumçusu (yarımmüdafiəçisi)/ Left Winger

-          Sağ cinah hücumçusu (yarımmüdafiəçisi)/ Right Winger

Müəllifin fikri:

26-30 yaş arası bir forvard üçün ən ideal vaxt sayılır. Kwame də elə 26 yaşındadı. Çox güman ki, gələn sezon Neftçinin hücum xətti Dario – Dabo – Karikari olacaq. Amma Roberto Bordin bəzən 4-4-2 və ya 3-5-2 kimi sxemləri yoxlayaraq irəlidə Dabo – Karikari ikilisinə şans verə bilər. Fikrimcə, Kwame Karikari komandanı çempionluğa daşıya biləcək bir oyunçudu və Neftçi üçün xeyirli transfer olacaq.