Jann-Fiete Arp

Ad: Jann-Fiete Arp

Vətəndaşlıq: Almaniya

Doğum tarixi: 06.01.2000

Klub: Hamburg

Mövqe: Hücumçu

Boy: 1.84

İşlək ayaq: Sağ

Transfermarkt dəyəri: 7.5 milyon €

Oyunçu haqqında:

4 yaşı olarkən SV Wahlstedt klubunda futbola başlayan Arp 2010-cu ildə Hamburg’un uşaqlardan ibarət komandasına keçir. 2015-ci ildə bu klubun U17 komandasına yüksəlməyi bacarır, 2017-ci ildən isə Hamburg’un əsas komandasının üzvüdür. Əsas komandadakı ilk sezonunda da istedadını nümayiş etdirməyə davam edən gənc forvard Bayern, Chelsea, Tottenham kimi komandaların diqqətini çəkməyi bacarıb.

Statistikası:

Komanda - Oyun / Qol / Assist

Hamburg U17 – 45/ 37/ 2

Hamburg U19 – 9/ 9/ 1

Hamburg – 18/ 2/ 0

Almaniya U16 – 4/ 0/ 0

Almaniya U17 – 19/ 18/ 0

Oyun tərzi:

Hər şeydən öncə Jann-Fiete Arp hərtərəfli forvarddır. Sağ ayağıyla yaxşı, sol ayağı ilə normal səviyyədə oynaya bilməsi, başı ilə fərqlənməyi bacarmağı, dribling etmək qabiliyyəti və sürəti bunu deməyə əsas verir. Fiziki cəhətdən də yaşına görə ideal səviyyədədir. Bəzi hallarda fiziki mübarizələrdə özündən daha yaşlı, daha təcrübəli futbolçulara çətin anlar yaşatdığının, hətta qalib gəldiyinin şahidi olmuşuq. Amma hücumçunun bu cəhətləri ilə bərabər olaraq müəyyən çatışmazlıqları da var. Məsələn, topsuz oyunda elə də effektiv olduğunu demək olmaz. Müdafiəyə kömək məsələsində də müəyyən problemlər yaşayır. Həmçinin, əsas heyətdə başlayıb 90 dəqiqə oynadığı oyunlarda sona 20-25 dəqiqə qalmış müəyyən yorğunluq müşahidə olunur. Bundan əlavə olaraq, komandasının və ya özünün oyununun alınmadığı halda həvəsdən düşməyi, komandaya xeyir verə bilməməyi digər yaşıdları kimi Arp’ın da problemidir. Amma bütün bu mənfi cəhətlərini öz üzərində çalışaraq zamanla aradan qaldıra bilər.

Oynaya biləcəyi sistemlər:

-          Tək hücumçulu sistemdə mərkəz hücumçusu

-          2 hücumçu ilə oynayan komandalarda həm mərkəz, həm də köməkçi hücumçu

-          Sol cinah yarımmüdafiəçisi (Left Winger)

-          Sağ cinah yarımmüdafiəçisi (Right Winger)

Oyun stilinə görə bənzədiyi futbolçular:

Robert Lewandowski, Timo Werner

Müəllifin fikri:

Jann-Fiete Arp öz yaşıdları arasında dünyadakı ən böyük istedadlardan biridir. Fikrimcə, hal-hazırda top klublara transfer olunmaq onun üçün çox tez olar. Hamburg’un da 2. Bundesliga’ya düşdüyünü nəzərə alsaq, Arp artıq daha çox şans əldə edə və özünü daha yaxşı tərəfdən göstərə bilər. Ola bilsin onu gələn yay Bundesliga’nın yuxarı yerlərə oynayan komandalarında görə bildik. Amma bunun üçün daha çox çalışmalı və özünü inkişaf etdirməlidir.