Gelsenkirchen’də bir Alman-İtalyan: Domenico Tedesco

                                          Gelsenkirchen’də bir Alman-İtalyan

Futbolda “taktika” deyəndə ağıla ilk gələn xalqlardan biri, bəlkə elə birincisi italyanlardır. Nizam-intizam deyəndə isə, şübhəsiz ki, almanlar yada düşür. İtalyanların taktiki cəhətdən necə olduğunu göstərmək üçün Arrigo Sacchi, Maurizio Sarri, Conte, Allegri kimi məşqçilərin adlarını çəkmək kifayətdi. Amma italyan taktikası ilə almanların disiplinasının vəhdəti, yəqin ki, əksəriyyətə maraqlı gələr. Müasir futbolda bu vəhdətdən istifadə etməyən çalışan
ən tanınmış mütəxəssis kimi Domenico Tedesco’nun adını çəkmək olar. Əslinə qalsa, o da elə də çox tanınmır.

1985-ci ildə İtaliyanın cənubunda yerləşən Rossano şəhərində dünyaya göz açan Domenico’nun valideynləri övladlarının 2 yaşı olarkən Almaniyaya köçməyə qərar verirlər. Atasının yazıçı olaraq işlədiyi Eßlinger Zeitung adlı qəzetin idman üzrə bölməsində təcrübə toplayan Tedesco peşə təhsilini “topdan və xarici ticarət üzrə tacir” olaraq tamamlamış, Sənaye Mühəndisliyi üzrə Bakalavr və İnnovasiya idarəetməsi üzrə Magistr təhsili almışdır. Almaniyanın məşqçilik məbədi hesab olunan Hennes Weisweiler Academy’ni “ilin ən yaxşısı” kimi tamamlayan Domenico məşqçilik karyerasına Stuttgart’ın gənc komandasında Thomas Schneider’in köməkçisi kimi başlamışdır. Stuttgart’ın U17, Hoffenheim’ın gənc və U17 komandasında baş məşqçi işləyəndən sonra ilk əsas komanda təcrübəsi olan 2. Bundesliga komandası Erzgebirge Aue tərəfindən təklif alır. Domenico Tedesco 8 mart 2017-də baş məşqçi postuna gətiriləndə komanda liqada son pillədə idi, ilk 5 oyununda 13 xal toplamağı bacaran məşqçi sonda 14-cü yeri tutaraq komandanı liqada saxlamağı bacardı. Tedesco 30 iyunda Aue’dən ayrılaraq, Bundesliga’nın ən köklü klublarından birinin – Schalke’nin baş məşqçisi təyin olundu.

İlk 11 turdan sonra 20 xalla əzəli rəqibi – Borussia Dortmund ilə 3-4-cü yerləri bölüşdürən Schalke komandası üçün bu nəticəni kifayət qədər yaxşı saymaq olar. Şübhəsiz ki, əldə edilmiş bu nəticənin memarı öncəki abzasda haqqında bəhs etdiyim Domenico Tedesco’dur. Bundesliga’da geridə qoyduğumuz 11 oyunun 10-da komandasını “Üçlü müdafiə” ilə meydana çıxarmış bu 32 yaşlı gənc baş məşqçinin ən çox istifadə etdiyi taktiki sxem isə 3-4-3’dü. Yay transfer sezonunda kapitan Benedikt Höwedes’i komandadan göndərərək əksər azarkeşlərin narazılığına səbəb olan Tedesco’nun ən çox üstünlük verdiyi müdafiə üçlüsü Nastasic – Naldo – Kehrer hesab olunur. Oktyabr ayının böyük hissəsində zədəli olan serbiyalı Matija Nastasic’i isə Benjamin Stambouli əvəz etdi. Schalke bu sezon çempionatda Bayern’dən sonra ən az qol buraxan ikinci komandadı. 11 oyunda sadəcə 10 qol buraxan Gelsenkirchen’lilərin bu uğurunda müdafiədən savayı qapıçı Ralf Fahrmann’ın da ciddi rolu var. Tedesco’nun komandasının ən önəmli fiquru bu sezon komandanın bombardiri olan Leon Goretzka’dı. 4 qol vuran alman futbolçu komandaya yalnız qol vurmaqla yox, oyun içində istər geri, istərsə də irəli xətdə göstərdiyi aktivliklə də xeyir verməyi bacarır. Qolların vurulmasında ən çox iştirak edən oyunçu isə avstriyalı forvard Guido Burgstaller’di: 3 qol, 2 assist. Gənc məşqçi olan Domenico Tedesco’nun bu sezon kəşf etdiyi gənc oyunçu kimi 1998 təvəllüdlü Weston McKennie’nin adını çəkə bilərik. Mərkəz hücumçusu olaraq Burgstaller, Di Santo və Embolo kimi variantlara sahib olduğuna görə bu mövqedə məşqçinin problem yaşamadığını demək olar. Hücumun cinahlarında 20 yaşlı Amine Harit bu sezon hələ ki 4 assist, Yevhen Konoplyanka isə 1 qolla yadda qalıb.

Schalke olduqca gənc, potensiallı məşqçi və futbolçulara sahibdi. Domenico Tedesco’nun rəhbərliyi altında Goretzka, Meyer, Kehrer, Harit, Embolo və s. kimi oyunçular öz karyeralarının ən yaxşı sezonlarını keçirə, gələn yay daha iddialı komandalara transfer ola bilərlər. Bəlkə elə Tedesco’nun məşqçisi olduğu Schalke həmin iddialı klublardan birinə çevriləcək? Niyə də yox? Bunun için istər Domenico Tedesco’da, onu bu posta gətirən rəhbərlikdə və oyunçularında kifayət qədər potensial var.