Carlos Embalo

Ad: Carlos Embalo

Vətəndaşlıq: Qvineya-Bisau

Klub: Palermo

Mövqe: Sol cinah yarımmüdafiəçisi (Left Winger)

Boy: 1.75

İşlək ayaq: Sol

Transfermarkt qiyməti: 1.7 milyon avro

Oyunçu haqqında:

Carlos Embalo 1994-cü ildə Qvineya-Bisaunun paytaxtı Bisau şəhərində anadan olub. Məlumatlarda karyerasına Portuqaliyanın Chaves komandasında başladığı, 2013-cü ildə isə Chaves’in U-19 komandasından Palermo klubuna transfer olunduğu göstərilib. 2014-2016 illəri arasında 2 sezonda 3 müxtəlif komandada icarə əsasında çıxış edib. İcarə əsasında çıxış etdiyi klublardakı statistikası:

Carpi – 3 oyun

Lecce – 11 oyun, 2 assist

Brescia Calcio – 42 oyun, 5 qol, 11 assist

Güclü cəhətləri:

1.75 boyunda cinah oyunçusu olduğu üçün əks hücumlarda ciddi xeyir verməyi bacarır. Əgər transfer baş tutsa Qarabağın hücumlarının daha da sürətlənməsində böyük rola malik ola bilər. Həmçinin də Embalo qapalı müdafiələri yarmaq məsələsində də heç də pis deyil. Sol cinahdan etdiyi asmalarla da rəqib qapısı önündə təhlükə yarada bilər.

Zəif cəhətləri:

Oyunçunun ən böyük problemi qeyri-stabilliyi və zədəyəmeyilli olmasıdır. Palermo’nun heyətində son sezon sadəcə 12 oyuna çıxa bilən futbolçu sadəcə 1 assistlə yadda qalıb. Amma bu 12 oyundan sadəcə 3-də meydanda 90 dəqiqə qala bilib. Embalo Palermo klubunun heyətində son rəsmi matçına 12.03.2017 tarixində çıxıb və ilk hissədən sonra əvəzlənib. Bundan sonra Palermo’nun keçirdiyi 10 oyundan 3-də ehtiyat qalan futbolçu digər 7 oyunu zədə səbəbilə buraxmalı olub

Hansı mövqelərdə oynaya bilər?

Embalo’dan maksimum xeyir almaq istəyən məşqçi onu elə əsl mövqeyi olan sol cinah yarımmüdafiəçisi kimi oynatmalıdır. İşlək olan sol ayağı ilə zərbə vurmaqdan çox asma etməyə üstünlük verən futbolçunu sağ cinahda oynatmaq elə də doğru olmaz. Bundan başqa oyunçunu “iki hücumçulu” sistemdə boyu 1.85-dən daha çox olan forvardla yan-yana da sınamaq olar.

Müəllifin fikri:

Qarabağ üçün bu sezon Embalo’nu transfer etmək yox, satın alma maddəsiylə icarəyə götürmək daha doğru olardı. Çünki elə də yuxarı səviyyəli oyunçu deyil və Qarabağda istəniləni verib-verməyəcəyi sual altındadır. Əgər ümidləri doğrulda bilsə bir neçə il Qarabağın əsas simalarından birinə çevrilib, Reynaldo kimi daha üst səviyyəli liqa klublarının diqqətini cəlb edə bilər.