Denis Bouanga

Doğum tarixi: 11.11.1994

Mövqe: Sol cinah

Komanda: Nimes Olympique

Vətəndaşlıq: Qabon

Transfermarkt dəyəri: 1.750.000 €

Müqavilə müddətinin sonu: 30.06.2021

Boy: 1.80

İşlək ayaq: Sağ

Profil

Fransada qabonlu ata və fransız ananın övladı olaraq dünyaya gələn Denis Athanese Bouanga futbola FC Le Mans komandasında başlayıb. 2014-cü ildə Lorient B komandasına transfer olundu və peşəkar səviyyədə ilk oyununa Paris Saint-Germain qarşısında çıxdı. 2015-16 sezonunda ilk 5 oyunda şans qazandı, ilk qolunu Stade de Reims’lə oyunda vurdu.

Yanvar 2016-da icarəyə verildiyi RC Strasbourg’da yaxşı ikinci dövrə keçirdi və 18 oyunda 5 qolla yadda qaldı.

2016-cı ilin yayında Tours’a icarəyə verildi, 37 oyunda 16 qol, 6 assistlik performans göstərdi. Sezon sonunda geri qayıtdığı Lorient ilə Ligue 2’yə düşməyinə baxmayaraq müqavilə uzatdı. 2017-18 sezonunda komandasına Ligue 2’də 34 oyunda 9 qol assistlik xeyir verdi.

2017-ci ilin əvvəlindən Qabon millisinə dəvət alır. Futbolçunun milli karyerasında 8 oyunda 2 qolu var.

Futbolçu 17.07.2018 tarixində 3 milyon avro qarşılığında Ligue 1 komandalarından olan Nimes Olympique’ə transfer olunmuşdur.

Denis Bouanga sağ ayaqlı olmağına baxmayaraq ən çox oynadığı mövqe 4-4-2’də sol cinahdır. Son sezonda bəzən 4-3-3’də sağ cinah, hətta hücumçu mövqeyində belə çıxış etdi. Amma heç birində əsl mövqesində verdiyi qədər xeyir verə bilmədi.

Güclü cəhətləri (Əks-hücum, sürət, texnika, dribbling, pressing)

Əks-hücum: Denis Bouanga hər bir müdafiəçinin əks hücumda qarşı-qarşıya gəlmək istəməyəcəyi bir tipdə oyunçudur. Sezon ərzində də komandasına əks-hücumlarda çox xeyir verdi.

Sürət: Əksər oyunlara sol cinahda başlasa da oyun içində cinah dəyişdirməyi sevən Denis Bouanga bir cinah oyunçusunda olmalı olan ən vacib şey – sürəti ilə ön plana çıxır. Onsuzda əks-hücumlarda effektiv olmağına ən böyük səbəb də məhz çox yaxşı olan sürətidir.

Texnika və dribbling: Texnika baxımından yaxşı olmağı dribbling qabiliyyətini göstərməkdə ona kömək edir. Ayaqları ilə yaxşı oynaya bilməsi də qapanan komandalara qarşı oyunlarda Bouanga’nı ön plana çıxara bilir.

Pressing: Həmçinin, top rəqibdə olarkən etdiyi pressing və göstəridiyi çalışqanlıq sayəsində top qazanma faizi də kifayət qədər yüksəkdir.

Bütün bu xüsusiyyətlər: sürət, texnika, dribbling qabiliyyəti Bouanga’nı paxıl bir oyunçuya çevirmir. Cinah oyunçularının ən böyük problemlərindən biri olan komanda oyunu problemi Bouanga’da yoxdur və istər meydanda, istərsə də meydandan kənarda komanda yoldaşları ilə heç bir çətinlik yaşamır.

Zəif cəhətləri (Hava mübarizələri, yaradıcılıq, qərar vermək, bitiricilik)

Hava mübarizələri: 1.80 boyunda olmağına baxmayaraq hava toplarında ciddi problemlər yaşayır. Meydanın mərkəzində girdiyi ikili hava mübarizələrində qazanma şansı çox azdı. Rəqib komandanın hansısa korner və ya cərimə zərbəsindəndən sonra cərimə meydançası içərisində hava mübarizəsində rəqibinə məğlub olma ehtimalı kifayət qədər böyükdür.

Yaradıcılıq: Ötürmə dəqiqliyi məsələsində də elə də yaxşı olmayan Bouanga son sezonda 4 assist edə bilsə də bu problemi aradan qaldırmaq üçün çalışmalıdır.

Qərar vermək: Qabonlu oyunçu üçün qərar vermək də ciddi problem sayıla bilər. Bəzən zərbə yerinə ötürməyə, ötürmə yerinə də zərbəyə üstünlük verir, həmçinin də ötürmə edəndə və yaxud zərbə vuranda da doğru anda bunu edə bilmir. Ya tələsir, ya da gecikir.

Bitiricilik: Bitiricilik məsələsində də elə də yaxşı olduğunu deyə bilmərik. Statistik baxımdan qol vurmaq məsələsində yaxşı olduğu görünsə də əlinə düşən hər epizodu qola çevirə bilmir. Əgər bu çatışmazlıqlarını aradan qaldırsa daha yaxşı yerlərə gedə bilər.

Bənzədiyi oyunçular: Daniel Caligiuri, Juan Cuadrado, Michail Antonio, Antonio Candreva

Bouanga bu 4 oyunçu ilə eyni səviyyədə olmasa da müəyyən bənzərliklərə sahibdir. Hər 4 futbolçu da istər müdafiədə, istərsə də hücumda öz komandasına xeyir verə bilir. Denis Bouanga da bu xüsusiyyətlərə sahib bir oyunçudur.